لہریہ دوپٹے

اودھ میں، ساون کے مہینے میں منائے جانے والے تہواروں میں، دوپٹےرنگنے کی روایت بھی ایک جشن کی طرح شامل رہی ہے۔ موسم باراں کے اس خوبصورت مہینے میں اودھ کی خواتین اور لڑکیاں مل کر سوتی دوپٹوں کو لہریہ کی شکل میں رنگا کرتی تھیں۔ لکھنؤ کے مشترکہ فیملی میں خواتین دوپہر کے وقت چھتوں یا آنگن میں جمع ہو کر کچے رنگ گھولتیں اور دوپٹے پر اپنےمن پسند رنگوں کے میل جول سے انوکھے خوبصورت لہردار ڈیزائن والی دھاریاں بناتیں۔ 

سوتی کے سفید دوپٹے کو کلف لگا کر سکھا لیا جاتا ہے اور لمبائی کی طرف سے دو بار تہہ کرکے پرانے اخبار یا کپڑے کی سطح پر بچھا دیا جاتا ہے۔ ایک کچے سوت کی تقریباً 18 انچ لمبی ڈوری کے ایک سرے پر گرہ لگا کر، اسے رنگوں کے مختلف پیالوں  اورتسلوں میں مرضی کے مطابق ڈبودیا جاتا ہے۔ یہ دھیان رکھنا ہوتا ہے کہ رنگ گنگنے پانی میں اچھی طرح گھل گیا ہو۔

اس عمل کو تب تک دوہرایا جاتا ہے جب تک دوپٹے کی لمبائی رنگ نہ جائے۔ پھر دوپٹے کو کھولنے پر رنگین لہریں دکھائی دینےلگتی ہیں۔ اپنی مرضی کے مطابق رنگوں کے تناسب میں  تبدیلی کر کے اور لہروں کے زاویے بدل کر طرح طرح کے جامیٹرکل ڈیزائن بنائے جاسکتے ہیں۔ مثال کے طور پر، اگر دوپٹے کے درمیان سے تہہ لگا کر لہروں کی سمت بدلی جائے تو برفی یا کتلی کی شکل بن کر نکلے گی۔ 

اگر تہہ کئے ہوئے دوپٹے کے کونوں کو رنگ میں ڈبویا جائے تو تکونی کنیاں بن کر نکلیں گی۔ رنگائی کے بعد دو پٹوں  کو سکھا کر انہیں موڑکر ان میں چنائی کی جاتی ہے۔ چنائی سے چھاپی ہوئی لہروں میں  زیادہ بہاؤ رہتا ہے، جس سے اس کی خوبصورتی دوبالا ہوجاتی ہے۔ ان دوپٹوں کی کناریوں پر گوٹا ٹانکا جاتا ہے اور کئی دوپٹوں کو بادلے اور فردی سے اور کامدار بھی بنایا جاتا ہے۔