Castelo de Pambre

No século XV recibiu a instrución real de custodiar o Camiño, iniciando unha estreita relación coa ruta xacobea que continúa hoxe en día. Por que é especial este castelo? Na turbulenta Baixa Idade Media atopamos a resposta.

En Galicia atopamos un bo número de castelos e fortalezas de orixe medieval. No século XV, Galicia protagonizou a maior revolta da Europa medieval: a Gran Guerra Irmandiña. Tivo lugar entre os anos 1467 e 1469, período no que a poboación se rebelou contra a nobreza.

Varias irmandades (similares ás actuais milicias urbanas) organizáronse e asaltaron as torres e fortalezas de Galicia. Caeron todas, moitas delas derrubadas ata os cimentos.

A maioría dos castelos reconstruíronse nos anos seguintes, como os de Soutomaior, Nogueirosa ou Castro Caldelas, o cal se pode ver nesta imaxe.

Outros nunca se volveron a reedificar. É o caso do castelo de Rocha Forte, en Compostela, propiedade dos arcebispos de Santiago.

Pero realmente caeron todos os castelos? Non. Houbo un que resistiu os ataques e gañou a fama de inexpugnable: o castelo de Pambre.

Ten planta cadrada e está cercado por unha gran muralla de planta irregular que se adapta ao escarpado terreo.

O edificio principal dun castelo é a torre da homenaxe. No caso de Pambre, trátase dunha torre cadrada flanqueada por outras catro, tamén cadradas.

O conxunto complétano outras edificacións, entre elas un hórreo, destinado ao almacenamento de cereais e unha capela do século XII.

O castelo de Pambre está situado estratexicamente no centro de Galicia. O control visual que exercía sobre Palas de Rei permitía vixiar o paso a través do Camiño Francés.

En 1478, o rei Fernando o Católico ordena protexer os peregrinos en Galicia. O castelo asume a función de custodia do Camiño e de cobranza de portádegos para controlar o tránsito de persoas e mercadorías.

Na actualidade, mantense a vinculación entre o castelo e o Camiño: pola súa proximidade xeográfica á ruta xacobea moitos peregrinos se desvían para visitar esta fortaleza.

Restaurado pola Xunta de Galicia, e máis de seis séculos despois da súa construción, segue lucindo tenaz e inquebrantable como exemplo perfecto da arquitectura defensiva medieval.