Os Camiños de Santiago en Europa

En 1987, o Consello de Europa declarou o Camiño de Santiago como Primeiro Itinerario Cultural Europeo. Na actualidade hai 281 Camiños de Santiago catalogados, con máis de 83.000 km de percorrido por 29 países, que son mantidos por máis de 100 asociacións xacobeas de toda europa.

O Camiño de Santiago por antonomasia é o denominado Camiño Francés, con 750 km de percorrido aproximado, que comeza en Roncesvalles (Navarra) ou Somport (Aragón), dous puntos onde conflúen os catro grandes camiños franceses.

Ademais das rutas terrestres, están catalogadas 30 rutas marítimas a Santiago, que recollen desde as históricas dos primeiros séculos, ata as máis recentes, coma o Camiño da Antártida.

En 1993, o Camiño Francés e os Camiños en Francia foron declarados Patrimonio Mundial da Humanidade. Posteriormente, en 2015, foron declarados os denominados Camiños do Norte en España (da Costa, Primitivo, Vasco do Interior e Santo Toribio de Liébana).

En España declaráronse Patrimonio Mundial os percorridos dos Camiños. En Francia, porén, declaráronse os monumentos que están ao redor de catro grandes camiños tradicionais (Vías Turonensis, Lemovicensis, Podiensis e Tolosana).

As máis de cen asociacións europeas de Amigos do Camiño de Santiago teñen entre un dos seus principais cometidos atender os peregrinos, dándolles acollida e facilitándolles axuda de todo tipo ao longo da súa peregrinación.

Os Camiños de Santiago en Europa están sinalizados de diferente maneira, con frechas amarelas, vieiras do Consello de Europa e outro tipo de carteis. Todo para facilitar a chegada do peregrino a Santiago.

Eslovaquia terminou de sinalizar o seu camiño en 2019, un dos máis recentes. Este Camiño articula a ligazón dos Camiños do norte e do leste de Europa coa zona central.

Eslovenia tamén ten sinalizado catro Camiños de Santiago, que transcorren por inmensos bosques e ríos, paralelos á costa. Un ramal únese ao sur en Trieste cos Camiños italianos, e outro ao norte cos austríacos e suízos.

Aínda que os Camiños de Santiago no centro de Europa transcorren por grandes chairas ao redor do río Danubio, hai tramos moi duros, como o paso dos Cárpatos antes de chegar a Bratislava.

O punto máis afastado dos Camiños de Santiago en Europa é a cidade de Isasi, en Romanía, onde se puxo un fito xacobeo en 2019, co punto quilométrico 4.500.

O Camiño de Santiago máis longo é o Camiño da Antártida, que parte desde a base Gabriel de Castilla que ten España na illa de Decepción, na Antártida, a 14.075 km de Santiago. Disponse alí dun selo para acreditar os peregrinos que saian dese afastado punto.

En 2016, un grupo de científicos e militares do Exército español fixeron por primeira vez o Camiño da Antártida, realizando o percorrido no buque Hespérides ata Cartaxena, e os 100 km desde Pontevedra, pola ría de Arousa.

As asociacións de toda Europa facilitan o documento que identifica os peregrinos, a credencial, que é debidamente selada polos lugares de paso e albergues, como o de Gradignan, preto de Bordeos, en Francia.

Centos de miles de peregrinos chegan cada ano a Santiago despois de percorrer o seu camiño. Alí deben facer longas filas para obter a Compostela, o certificado que acredita a realización do Camiño.