Preparación e coidados durante o Camiño

Para facer o Camiño a pé é moi importante o tempo dedicado ao adestramento previo. Este debe realizarse preferentemente en terreos con subidas e baixadas que preparen os nosos músculos para a peregrinación.

O adestramento previo e diario mediante camiñadas cada vez máis longas debe ir parello á realización de exercicios de estiramento e quecemento, que han de ser constantes mentres se está facendo o Camiño.

Planifica as etapas e a forma de facelas de xeito personalizado. Que o Camiño se adapte ás túas capacidades físicas e aos teus obxectivos. Dosifica o esforzo e segue o teu propio ritmo. O Camiño non é unha carreira. Tan importante é o traxecto como a meta.

Permite o acceso aos albergues e serve como certificación do percorrido realizado para solicitar, ao final da túa peregrinación, a Compostela.

Podes obter a túa credencial no Centro Internacional de Acollida ao Peregrino en Santiago de Compostela, na sede de confrarías de peregrinos, en albergues e nas parroquias. Tamén a través das asociacións de amigos do Camiño de Santiago repartidas por todo o mundo.

Unha mochila correctamente cargada para este tipo de actividade non debe exceder os 10 kg de peso. Tamén é importante que conte con sistemas de protección nas correas para impedir as rozaduras na pel. Debe ser cómoda, facilmente adaptable e lixeira.

Débese levar pouca roupa, adaptada á estación, con tecidos illantes, gorros durante todo o ano (ben para o sol, ben para o frío) e un bordón, é dicir, un bastón de apoio para o camiño.

Algúns elementos básicos que non deberías esquecer son: un saco de durmir, calzado para o descanso, unha cantimplora, crema con protección solar alta, unha pequena caixa de primeiros auxilios, móbil con cargador e a túa documentación.

A nosa pequena caixa de primeiros auxilios deberá conter o indispensable para o coidado dos pés e a protección da pel. Se o espazo o permite, podemos engadir algunha crema antiinflamatoria, un analxésico e algún outro básico (por exemplo antiácidos) en función da nosa caixa de primeiros auxilios habitual no fogar.

O inicio da marcha debe ser sempre suave e rítmico. A marcha debe manterse regular e continua. O ritmo da camiñada debe permitirche manter unha conversa sen esforzo.

En estradas circula pola esquerda e, se existe, pola beiravía. Utiliza elementos luminosos ou reflectores. Se circulas en grupo por estrada, faino en ringleira individual.

Se fas o Camiño en bicicleta, procura que sexan etapas de entre 60 e 100 km.

En bicicleta debes circular pola dereita da estrada e usando a beiravía. Os grupos deben ir en columna de dous en dous e sempre preto da beiravía.

A limpeza da pel e a hixiene nos pés son fundamentais. O lavado en auga moi fría (mesmo con xeo) pode aliviar o peso da camiñada. Os calcetíns deben ser preferentemente de algodón e sen costuras. Nunca inicies o Camiño con calzado por estrear.

As características da etapa poden requirir refrescar os pés con máis frecuencia, para o que podes aproveitar as pequenas paradas ou descansos. É importante que seques os pés moi ben, preferiblemente ao aire.

A hidratación é fundamental para a realización das etapas do Camiño. Debes tomar líquidos, antes, durante e despois da camiñada, ademais de inxerir alimentos que acheguen hidratación ao teu organismo.

As comidas deben ser pouco copiosas e adecuadas ao exercicio que vas facer. Aproveita as paradas para beber e comer algo en cantidades pequenas.

Os descasos non deben prolongarse en exceso. 5 ou 10 minutos de parada son suficientes.

Se vas en bicicleta, os descansos serán pouco frecuentes e de curta duración. Pola túa seguridade, detente sempre fóra da estrada e da beiravía.