Publikoa, Florentzia Audience 01, Florenz 2004

Thomas Struth (Geldern, Alemania, 1954) panorama artistiko garaikideko figurarik nabarmenenetako bat da, baita Bigarren Mundu Gerraren ondorengo Europak eman duen argazkilarien artean eraginik handiena izan duenetako bat ere. Bere lanean, Struthek ez ditu egoerak dokumentatzen; aitzitik, arretaz begiratuta baino antzematen ez diren ñabardura eta xehetasun bisual bikainak jasotzen ditu denbora motelarazten duen behaketa lasaia abiapuntu hartuta.

Struthen bilakaera artistikoa inguruan izan dituen testuinguru sozial ezberdinek markatu izan dute. Lehen argazkiak, 1973–76 urteetakoak, Düsseldorfeko Arte Ederren Akademiako ikasle zela egin zituen, hiriko kaleetan oinarrituta egin ere. Geroztik, haren sail ugarik agerian jarri izan dute artistak oso genero desberdinak lantzen dituela eta horien artean ustekabeko loturak ezartzen dituela —berak bistaratu arte ezkutuan dauden loturak, alegia—. Sail horien artean aipagarriak dira New York hiriko kaleak (Straßen von New York City), Toki inkontzienteak (Unbewusste Orte), Familia-erretratuak (Family Portraits), Museo-argazkiak (Museum Photographs), Publikoa (Audiences), Paradisuko irudi berriak (New Pictures from Paradise), baita berriagoak diren Natura & Politika (Nature & Politics) eta Animaliak (Animals) ere.