Infinituaren isla-gela – Gizakientzako zorion-guraria, unibertsoaz harainditik igorria

Yayoi Kusama (Matsumoto, Nagano, 1929) artista eta idazle japoniarra ahots berezia da artegintzan eta, ahanzturan egon ondoren, artearen historiak dagokion lekua eman dio, ikono kultural global bihurtzeraino. Azken zazpi hamarkadetan, Kusamak tinko heldu dio bere ikuspegi abangoardistari, eta bere bizi-filosofia islatzen duen estetika pertsonala biribildu du. Sorkuntza garaikideko figura aitzindaria eta nabarmena izaki, gizartea eraldatzeko bitarteko moduan ulertzen du artea, eta hainbat diziplina lantzen ditu horretarako, hala nola performancea, pintura, marrazkia, eskultura, literatura, bai eta bere murgiltze-instalazio ezagunak ere: Infinituaren isla-gelak.

Kusama loredi zabalen artean bizi izan zen haurtzaroan; Infinitu-sareak (Infinity Nets) ezagunak egiteko inspirazioa, ordea, Ozeano Barea ikusteak ekarri zion, 1950eko hamarkadaren amaieran Estatu Batuetara hegazkinez egin zuen lehen bidaian. Pintura horietan, keinu bakar eta azkar batekin margotutako zirkuluerdi txiki pila batek modu obsesiboan estaltzen dute mihisea, eta sarez eta elkarri lotutako puntuz osatutako eredu espresionista bat eratzen dute elkarrekin. Obra horien monumentaltasuna areagotuz joan zen pixkanaka-pixkanaka; hainbeste, non 1961ean tamaina ikaragarriko Infinitu-sare batek goitik behera estali baitzuen New Yorkeko Stephen Radich Gallery-ko horma bat.