Michi, o can do Camiño

En maio de 2019, Kimiko Uchii e Tamano Hayashi atopábanse realizando o Camiño Francés cando, á altura de Portomarín, un pastor catalán, esmirrado e exhausto, se lles achegou cauteloso implorando algo para comer. Era a primeira vez que o vían e as mulleres non dubidaron en axudalo. Ao día seguinte, o peludo uníuselles á marcha.

Ao chegar á localidade de Palas de Rei, xa por entón moi preocupadas, as peregrinas falaran con decenas de persoas, veciñas e peregrinas, e comezaban a decatarse do absoluto desamparo que padecía o animal.

A insistencia das xaponesas chegou a oídos do Concello de Palas de Rei, que enviou a Protección Civil a interceptalas para levar o can. A preocupación das mozas pola sorte do animal levoulles a publicar o caso en redes sociais e a poñerse en contacto con APACA, a Asociación Protectora de Animais do Camiño, que foi recollelo.

Lamentablemente este concello, como a maioría dos que percorre o Camiño Francés, non tiña ningún servizo de recollida, albergue ou protección de animais abandonados que puidese facerse cargo do animal debidamente.

Michi significa “camiño” en xaponés. Este foi o nome co que Kimiko, Tamano e mais APACA decidiron bautizar ao que sería o can máis famoso da historia da protectora. Outros peludos rescatados tamén por peregrinos foron Way, Camí ou Camiño, nome que fai referencia ao lugar onde se atoparon.

Michi quedou a cargo de APACA durante os 6 meses que duraron os preparativos e trámites para que finalmente puidese entrar no país nipón. En moi pouco tempo revelouse como un can extraordinario, listo (e non só por arrimarse a Kimiko e Tamano aquel día), protector, líder, vital e cunha enorme capacidade de adaptación.

Durante o tempo que estivo na Asociación gañouse o corazón de coidadores, voluntarios, peregrinos, xornalistas, veciños, visitantes e, por suposto, dos seus irmáns, os outros peludos cos que conviviu: Way, Camí, Silver, Yi...

A súa historia tamén chegou á prensa e á televisión galega e española, logrando incluso unha mención na NHK (TV xaponesa)...

... e incluso participou no documental de Facebook "Estación Central".

Nas xestións para a viaxe de Michi colaboraron persoas como Megumi Shiozawa da Casa Galicia Xapón (RIP; Arigatōgozaimashita Megumi).

Finalmente, o 24 de decembro, tras moita preparación e coordinación entre o Xapón e Galicia, chegan Kimiko, Tamano e Kiroko (unha amiga de ambas as dúas) a buscar a Michi nun reencontro épico que volve saltar aos medios.

As persoas e peludos de APACA, que conviviron con Michi durante eses meses, pasaron con elas a Noiteboa e o Nadal, para confraternizar e para facilitar o proceso de adopción e o cambio que o peludo ía vivir. Casa Pontesarela, en Santiago, ofreceulles o seu aloxamento dogfriendly sen custo ningún. 

Afortunadamente, todo foi ben e Michi chegou á súa nova casa en Osaka o 2 de xaneiro. Alí esperábano Haruyo e Soshichi, nai e pai de Kimiko, que apoiaron a adopción desde o principio e abríronlle o seu fogar nunha pequena poboación da prefectura de Osaka.

Polo Camiño de Santiago chegan cada ano peregrinando en compañía dos seus humanos uns 2.000 cans. Outros 50.000 habitan (a maior parte deles atados ou encerrados permanentemente) nos Concellos que atravesa tan só a ruta francesa en Galicia. E varios miles aparecen cada ano perdidos ou abandonados en todos os Camiños, dos cales moi poucos chegarán a ter un final feliz como o de Michi.

O conto de Nadal real que protagonizaron Michi, APACA e as súas salvadoras tivo un final feliz e, máis dun ano despois, seguimos recibindo periodicamente vídeos e noticias do noso querido compañeiro que nos mostra os lugares máis belos do país nipón a través das súas excursións e peregrinacións caninas polo Kumano Kodo, unha rede de camiños de peregrinación moi coñecida en Xapón.

1. Comproba se ten chapa de identificación e teléfono.
2. Pregunta á veciñanza da zona, moitos teñen casas a pesar de que estean soltos.
3. Chama á policía local (092) ou ao Concello (010), ambos teñen competencia nestes casos.
4. Tamén podes chamar a APACA para que te informen e axuden. Envía unha fotografía e a súa localización para que poidan publicar o caso e axudarvos.
5. Se o desexas, tamén podes levalo a unha clínica veterinaria para comprobar se ten chip.

1. Non o movas. Se é necesario, bríndalle sombra ou protección da choiva ou o frío.
2. Non lle deas de comer. Tan só auga se é seguro.
3. Chama ao 112 e proporciona a túa localización.
4. Ponte en contacto con calquera organización de protección de animais ou refuxio como APACA.
5. Mentres espera a axuda, mantén a calma, non presiones o animal e, se é salvaxe, garda a distancia.